ايه وللبشر يا يمه بس تمشين
واترتل بشرنه ابشوفج الايه
ولان حبح ظريح الناس داخت بيه
تعنت كلهه لجلج دوم مشايه
حضنج باب كعبه الدنيه لاذت بيه
وعينج نور شمس يطر الولايه
تحت جدمج جنانا الرحمه صارت فيض
وحدر جغج تنام لضحكه بهدايه
دللولج لحن يا يمه للعشاك
وعجز عود المقام يجيبه حبايه
يا غيمه لارض عطشانه لجلج شوك
زرع هاي البشر واعيونج المايه
يمه انت اشكثر سهرتي حته الليل
ايس نام يمج وانت سهرانه
تعب ليل الصبر بس ما تعبتي بيوم
وحزن حته الصخر جيف انت حزنانه
يمه الكاع زحمه بلا محط رجلين
بس تصفه ابفراغ بشوفج ويانه
حمل جتفج صبر ما مره شافه ايوب
و جز ايوب صبرج صاح يكفانه
يمه الموت يمج خاف من الموت
ارتعب من شاف طولج حضر اجفانه
صعب جدا فراقج يمه لوتدرين
وعزف حته الدمع بفراكج الحانه
بسماتج رسول وضحكتج قرأن
و ابصوتج براثا ايبدل اذانه
كلماتج لغز دوخت كل تفسير
المعجم لو سمعهه يضيع السانه
ولو مسج زعل يرتفع سيل الغيض
ويغص حته البحر مرعوبه شطأنه
لان انت حظارة ومركز التاريخ
كلكامش اخلدج وامحي نسيانه
احوكن من حنانج عالبشر قمصان
واذا مسج زعل تتشكك اردانه.........
مصطفى الزيدي
الجمعة أغسطس 07, 2009 2:48 pm
